Қишлоғимиз Барчинойлари
2025-02-10 25 0
Тароз шаҳрида ўтказилган дзюдо бўйича халқаро турнир ўз ниҳоясига етди. Ушбу турнирда қишлоғимиздан чиққан Қурбоной Холбой қизи Мирзахонова ва “Турон” ўрта мактаби ўқувчиси Рухшона Нурулло қизи Абдурасул ҳам иштирок этди.
Аёллар ўртасида 44 кггача бўлган вазнда Тожикистон ва Ўзбекистондан келган кураш усталарини ҳам мағлуб этган Қурбоной финалда қирғизистонлик рақиби билан куч синашди. Қизиқарли ўтган финал баҳсида Қурбоной Мирзахонова иппон (тоза) билан ғалаба қозониб, олтин медалга сазовор бўлди.
Қурбонойнинг ютуғи билан уни вояга етказган бувиси Назира опа Раметовани, устози ва онаси – таниқли мураббий, дзюдодан Осиё чемпиони, спорт устаси Шоирахон Шахобиддин қизи Самиевани табриклаймиз.
Мураббий Шоира Самиеванинг яна бир шогирди, “Турон” ўрта мактаби ўқувчиси Рухшона Нурулло қизи Абдурасул эса учинчи ўринни эгаллади.
Қишлоқ спортини ривожлантириш мақсадида “Қорачиқ-М” хусусий мактабида мураббий Шоира Самиева раҳбарлигида бепул дзюдо ва кураш тўгараклари фаолият юритмоқда.
