“Турон” Қозоғистон чемпиони!
2025-04-18 17 0
Туркистонда Қозоғистоннинг волейбол бўйича 2024/25 мавсуми Олий лига чемпионати якунланди — “Турон” учинчи бор чемпион бўлди!
Пайшанба куни Туркистон шаҳрида Қозоғистон Республикасининг 2024/25 йилги мавсуми Олий лига чемпионати ўз ниҳоясига етди. “Қайсар” устидан иккинчи ўйинда ҳам ғалаба қозонган “Турон” жамоаси мамлакат чемпионлигини учинчи йил кетма-кет қўлга киритди.
Финал ва учинчи ўрин учун ўйинларда иштирок этган тўртта кучли жамоа мусобақа якунларини жумага қолдирмади. Чоршанбада бўлган каби, финалнинг иккинчи ўйини ва бронза медали учун беллашув ҳам “Турон” ҳамда “Жас Берел” жамоаларининг ғалабаси билан якун топди.
Ўз дебютини нишонлаган Ўскаменнинг “Жас Берел” жамоаси “Шимкент-Динамо”га қарши беллашувда тай-брейкда ютуққа эришиб, чемпионатнинг бронза медалини қўлга киритди.
Мусобақа хўжайинлари “Турон” эса мамлакатнинг энг кучли жамоаси сифатида учинчи йил кетма-кет чемпионликни нишонлади. Қизилўрда вилояти жамоаси “Қайсар” бу сафар ҳам рақибларига муносиб жавоб бера олмади ва иккинчи йил қаторасига иккинчи ўринни эгаллади.
Шундай қилиб, мавсум расман якунланди ва барча жамоалар ўз якуний ўринларини билиб олишди.
Яна шуни таъкидлаб ўтиш керакки, “Турон” клуби таркибида ҳамқишлоғимиз Санжар Иззетовнинг ҳам борлиги барчамиз учун фахр. Шогирдининг ютуғини кўрган устози таниқли мураббий Абсалон ака Ўринбосаров учун бундан ортиқ бахт булмаса керак. Биз ўз навбатида қадрли устоз Абсалон ака Ўринбосаров ва шогирди волейбол устаси Санжар Иззетовни ҳамда совриндор жамоаларни муборакбод этамиз!
